Icon Icon

السبت، 27 نوفمبر 2010

تبقى فى بؤك وتقسم لغيرك


بعد كام اسبوع من ظهور النتيجة ..... كان ( شقيان ) مستنى جواب التعين يجيله من الكليه ..... ومافيش حاجة جت .... فقرر ياخد بعضه ويروح الكلية يسأل عن التعين ويشوف اخباره ايه..... وامتى الجواب هيجيله .... وفى يوم صحى من النوم ..... لبس اجمد حاجة عنده ..... وصبح على ابوه ...وقاله انه رايح الكلية يعرف اخبار التعين ايه .


- ادعيلى ياحج .
- ربنا معاك ويكرمك يابنى ويفرحنى بيك .

وفتح (شقيان ) الباب ونزل ..... وصل الكلية و راح على مكتب شئون العاملين ودخل يسأل على التعينات الجديدة .... اول مادخل لاقى موظف قاعد ماسك الجرنال وبيقرا فيه ..... ما انتو عارفين اغلب الموظفين ثقافتهم عاليا جدا .... بس فى الكلمات المتقاطعة ..... وبينده على زميله اللى جمبه .

- يا ( لمض افندى ) ... يا ( لمض افندى ) ..... (ماتضحكوش هو اسمه كدا لمض افندى ) ..... كلمة من تلت حروف وفيها ميه .

وبدون تفكير رد (لمض افندى ) .

- ترعة .

كل ده و( شقيان ) واقف متابع الموقف ده وسمع كلمة ترعة دى ضحك وقاله .

-لاء بحر او نيل يا استاذ .

وراح (شقيان ) للاستاذ (لمض افندى ).... وهو متحمس .

- لو سمحت انا كنت عايز اسأل عن التعينات الجديدة للمعيدين .
- احنا بعتنالهم ياسيدى .
- بس انا مافيش حاجة جاتلى .
-خلاص .... يبقى ماتعينتش .
- ازاى يعنى دا انا الاول على الدفعة كلها .
- يبقى حاجة من الاتنين يا الشروط ماتنطبقش عليك ..... يا الجواب ضاع فى البُسطة .
- ضاع .... ازاى ..... طب مش المفروض عندكم اسماء المعينين .
- اكيد موجودة .
- طب شوف اسمى .
- لاء حضرتك تروح لمدام ( عُقد هانم ) بضم العين ( احنا اتفقنا مانضحكش) ... هتلاقى الاسماء عندها .
- ودى فين الاستاذه ( عُقد ) .
- الاوضة اللى بعدى على طول .

( شقيان ) جرى على الاوضة و دخل ..... لاقى مجموعة من الموظفات.... وهكرر تانى .... موظفات .... مافيش فيهم راجل واحد .... معرفش ليه الواحد مايدخلش اى مصلحة حكومية غير لما يلاقى فيها 90% ستات والباقى رجالة .... ده لو لقيت راجل اصلا .... تقريبا الوظايف فى الحكومة نازلة لستات بس ..... وقال ايه عايزين يتجوزوا ...... طب ازاى وهما واخدين مكان الرجالة فى الشغل .... والرجالة قاعدة على القهوة ..... طب يتجوزوهم ازاى وهما مش لاقين ياكلوا .... ياريت الستات ما تزعلش منى .... بس سيبوا كام وظيفة كدا لكام راجل عشان يعرف يفتح بيت ... ونحل شويا من البطالة والعنوسة .... نرجع لـــ (شقيان ) تانى ... بعد ما دخل الاوضة ..... ببرءة سأل فين مدام (عُقد ) ..... لاقى صوت بيرد عليه ولا اكن راجل هو اللى بيتكلم بيقول .
- خير ..... انا ( عُقد ) ...... قال يعنى فرحانة باسمها اوى .

اتجه ( شقيان ) نحيت الصوت .... لاقى كائن حى كدا زى الدرفة قصاده .... وحاطة كل الميك اب اللى فى البلد تقريبا ( مش بقولكم عنوسة...ليها حق تبقى عُقد ) .... مسك نفسه وراح ناحيتها .

- صباح الخير يا استاذة .
- اهلا .... اؤمر .
- عايز اعرف جواب التعين ماجاش لحد دلوقتى ليه .
- يمكن يكون اتأخر فى البُسطة .
- طب ممكن تشوفيلى اسمى فى التعينات الجديدة .
- ما بناخدش من التعينات غير وجع القلب .... قول .... اسمك ايه ؟ .
- شقيان صابر شقيان .

فتحت دوسيه كدا كان قدمها .... وقعدت تشوف فيه وقالت .

- لاء اسمك مش هنا .... مش من المعينين .

هو سمع الكلمة دى ... وكأن نزل عليه جبل ميه ساقعة ... مع كام شومة فوق دماغه ... وحاول يمسك نفسه وسألها .

- طب ازاى ..... دا انا الاول على الدفعة .
- ممكن الشروط ماتنطبقش عليك ..... وخصوصا انهم نزلوا شروط جديدة السنة دى .
- شروط جديدة .... زى ايه ؟ .
- انا مش عارفة ... هو انت ابن دكتور ؟ ... ليك حد قريبك ماسك منصب فى البلد ؟... من الاخر ليك حد يوصى عليك ؟.
- لاء ..... بس انا الاول .
- اول ايه .... هى مش بالاول والاخير ....هى ماشية انت ابن مين .... تعرف مين .... كدا ... انت كنت قسم ايه ؟.
- محاسبة ؟ .
- اللى اتعين فى القسم ده ..... زميل ليك اسمه ( مسنود ابو المصالح ) .
- ( مسنود ) ؟؟؟؟؟؟!!!!! ..... ازاااااااااى ...... ده جايب جيد ..... ولا عشان هو ابن الدكتور ابــــــــ .

وقاطعته ( عُقد ) وهى بتقوله .

- بالظاااااااابط .... عشان ابن الدكتور ( ابو المصالح شايف حاله ) .... وعشان الشروط الجديدة تنطبق عليه بالحرف ..... الحدق يفهم بقى .

( شقيان ) مبأش عارف يعمل ايه ..... بيشوف مستقبله بيضيع قدامه او ضائع فعلا ومش عارف يتصرف .... دموعه عايزة تنزل ومابتنزلش .... نفسه يصرخ ويكسر الدنيا .... ومع ذلك واقع الصدمه عليه ..... خلاه ساكت خالص ... واول ما نطق قال .
- حسبى الله ونعمة الوكيل .

ياترى ايه اللى مستنى (شقيان) تانى ..... استنوا (شقيان) فى الحلقة اللى جيا

7 التعليقات:

غير معرف يقول...

هههههههههههههه
ربنا يكفينا شر الميرى وترابه
ربنا يوفئك يا كارم

خالد يقول...

تمام جدا
عجبانى الاسماء اوى ليها مدلولاتها
احنا معاك ياكارم
وربنا يرحمنا من وجع القلب ده

bella يقول...

هاهها حلو كتير و مع انها طويله بس ما بتمل منها بالعكس بتشوقك تكمل و من دون فاصل .اختيارك الاسماء حلو ومناسبه كتير في اماكنها متلا مدام عقد هاههاهاه شقيان..... الخ
اشتمل النص على احاسيس منتوعه وده اللي خلاها احلى .عجبني الموضوع وشدني اني اتابعها بالتوفيق يارب يا كارم
ويارب اننا ناخد منه درس مش نقراء ونضحك بس بجد سعيده بالاشتراك

karem omran يقول...

غير معرف
ربنا يكفينا شر اى حاجة بس فى حالة شقيان هنا ده مش شر الميرى لان المكان اللى كان هيبقى فيه مستقبل وشكل اجتماعى تانى خالص
وربنا يوفئنا جميعا ان شاء الله

karem omran يقول...

خالد
فرحتنى والله لما وصلك ان لاسماء ليها مدلولات لان ده فعلا مقصود فى القصة
ويارب تفضلوا معايا على طول يارب وتنورنى كدا دايما

karem omran يقول...

بيلا
الحمد لله ان ده اللى انتى حستيه عشان انا فعلا كنت خايف الناس تحس بالملل من القصة يمكن عشان بتناقش واقع كلنا عارفينه بس فعلا انا كان كل همى انى اخلى اللى يقرا مايملش ويتشد للاحداث وكمان يبقى بيضحك مع انه بيقرا مشكلة لشاب وبيصعب عليه اللى هو فيه واللى بيحصله
يارب اكون قدرت اعمل ده بشكل كويس وربنا يوفقنى فى الحلقات اللى جاية
انا اسعد باشتراكك وباشتراك كل الناس فى المدونة بجد شرفتونى
دعواتك ليا
عايز ارئكم فى مشاكل شقيان

ابراهيم شطا يقول...

احسنت ياكارم ...والى الامام دائما يا فنان