Icon Icon

السبت، 26 يونيو، 2010

الناجح يرفع ايده




الناجح يرفع ايده ،،،،، طبعا كلنا فاكرين الاغنية دى واكيد بتفكرنا بذكريات حلوة ، وفى منا اللى لسا بيدرس وان شاء الله ينجح ويسمعها قريب وكلنا نباركله ،،


المهم ،،،،

دى كانت رنة موبايل ( شقيان ) صحى من النوم على صوت عبد الحليم وهو بيقول ،،،،،، الناجح يرفع ايده ،،، هيه ( والله فال حلو ) اخد الموبايل ورد عليه لقى ( مظلوم ) هو اللى بيكلمه

- انت لسا نايم ،،،،، النتيجة ظهرت

وراح قافل السكة على طول ،، ملحقش ( شقيان ) حتى يرد ،

* *( مظلوم ) ده بقى لوحده حكاية ،،،،، حاجة كدا زى العسل ،، على اد الظلم اللى شافه وبيشوفه فى حياته على اد ما هو واخد كل حاجة ببساطة و بأبتسامة وسخرية

قام ( شقيان ) من على السرير منطور ومفزوع وهو عمال يتخبط فى الاوضة بتاعته عشان يلبس وينزل جرى على الكلية

عارفين انتم الاحساس ده طبعا ،،

وطول السكة عمال يكلم نفسه ،

- ياترى عملت ايه ، نجحت ولا ايه ، ان شاء الله ناجح ، طب لو نجحت هجيب تقدير ولا ايه ،،

يعنى حلمى هيتحقق وابقى معيد فى الجامعة لحد ما اكون دكتور فيها ،، يااااااااارب ،،، وفضل على كدا طول السكة

وكل شويا يقول للسواق ،،،،،

- شد حيلك يااسطى ،،، ونفسه يقوم يقعد مكانه ويسوق هو ،،،،، معزور والله انا حاسس بيه ،،،،،

وصل لحد الجامعة ونزل من الميكروباص ،،، وصاااااااااااااروخ ،،،، خدها جرى من الباب الرئيسى للجامعة لحد كليته

تشوفوه وهو بيجرى ساعتها تقولوا لو كان دخل بطولة العالم فى الجرى السريع كان هياخد مركز اول عن جدارة واستحقاق

* * ااااه صحيح ،،،،،، نسيت اقولكم انه بيدرس فى كلية تجارة ،،،،، كلية الشعب ،،،،،، عنصرية بقى ما انا تجارة زيه

بقى فى ثوانى فى كليته وتشوف المنظر على لوحات النتيجة المتعلقة ، عبارة عن ساحة قتال ،،،، هههههههه

زى لعبة حرب الشوارع اللى كلنا بنلعبها ،،،،،

بس مين ده ، ولا هزت فيه شعراية ،،،، وبكل استبسال وحب فى التضحية بالنفس ، دخل يجيب النتيجة بتاعته

خدلو كدا بتاع بوكسين ،،،،،،، على شلوتين ،،،،،، على .......... ولا بلاش عيب مش هنفضح الراجل ،

وخرج وهو فى منتهى السعادة وبعلو صوته ،،،،،،،

- نجحت ،،،،، نجحت ،،،،، نجحت وهبقى معيد ،،،،، يافرحتك بابنك ياعم ( صابر ) ،،،، صبرت يا أبا ونولت


استنوا اللى جى هتبقى اول مشكلة بتقابل ( شقيان )

6 التعليقات:

هيثم يقول...

جبار يا ابو المكارم
دى بداية الروائع
ربنا يوفقك

هيثم يقول...

هما كده الشعراء ديما ليهم شطحات

احمد يقول...

اسلوبك حلو اوى شدنى وانا بقرا ومخلينى مستنى اشوف اللى جى ايه هيحصل فيه
يمكن فى تعليقى اللى فات حسيت ان الجو كويس بس قولت ده بس عشان بداية وحتى قولتلك بس نشوف الباقى
وباين كدا ان الموضوع حلو

غير معرف يقول...

جميله اوي ياكارم مشاء الله عليك طريقتك في الاداء عالي استمر ربنا يوفقك (نسيم الروح)

H يقول...

تحفــــة .. مفيش تفاهم

بجد اسلوبك روعة يا كارم .. دا انت طلعت متعدد المواهب ربنا يحيمك يارب
عارف ان انا توسمت فيك بداية رائعة لسينارست شاطر إن شاء الله
عارف ليه ؟ لأنى الصراحة انت خليتنا نتفرج على مشهد بكل تفاصيله وبديكور وإضاءة وحركة كمان ..
بهنيك على البداية القوية دى وربنا يوفقك .. وانا اتشوقت جدا اعرف باقى حكاية (شقيان) ومتأكدة ان الحلقات الجاية هتكون اروع وهتتفوق فيها على نفسك

ألف مبروووك ل(شقيان) على النجاح ههههههههههه

ربنا يوفقك يــارب

عمــــــــــــ كـــارم ـــــــــران يقول...

لله يبارك فيك

شوفت بقى دى اقل حاجة عندى هههههههههه
بهرج طبعا ،،،،،، بس مش لدرجة انى ابقى سيناريست شاطر يعنى انا فين والناس دى فين انا بس بفضفض
على فكرة ( شقيان ) كمان مشتاق هو كمان يعرفك حكايته مش انت بس

ربنا يحميك يارب