اهلا بيكم

يا اهلا

اقرء المزيد

راح ..... راح .... خد املى وراح

عرفين احساس التوهان اللى كان فيه عبدالحليم اول ما خد الالم من عماد حمدى .... وعرف انه مش ابنه فى فيلم الخطايا .... وقعد يغنى وهو ماشى فى الشارع ... (جئت لا اعلم من اين .... ولكنى اتيت ) ..... ده كان نفس احساس (شقيان) بعد ما خد اول صدمة فى حياته كان حاسس بالتوهان ده ... عشان اول حلم ليه واهم حلم ليه ضاع منه .... بسبب المحسوبيا والواسطة .... مبأش عارف يرجع البيت يقول ايه ... يقول ان خلاص .... بعد التعب ده كله .... وصبر ابوه

اقرء المزيد

تبقى فى بؤك وتقسم لغيرك

بعد كام اسبوع من ظهور النتيجة ..... كان ( شقيان ) مستنى جواب التعين يجيله من الكليه ..... ومافيش حاجة جت .... فقرر ياخد بعضه ويروح الكلية يسأل عن التعين ويشوف اخباره ايه..... وامتى الجواب هيجيله .... وفى يوم صحى من النوم ..... لبس اجمد حاجة عنده ..... وصبح على ابوه ...وقاله انه رايح الكلية يعرف اخبار التعين ايه .

- ادعيلى ياحج .

- ربنا معاك ويكرمك يابنى ويفرحنى بيك .

وفتح (شقيان ) الباب ونزل ..... وصل الكلية و راح على مكتب شئون العاملين ودخل يسأل على التعينات الجديدة .... اول مادخل لاقى موظف قاعد ماسك الجرنال وبيقرا فيه ..... ما انتو عارفين اغلب الموظفين ثقافتهم عاليا جدا .... بس فى الكلمات المتقاطعة ..... وبينده على زميله اللى جمبه .

- يا ( لمض افندى ) ... يا ( لمض افندى ) ..... (ماتضحكوش هو اسمه كدا لمض افندى ) ..... كلمة من تلت حروف وفيها ميه .

وبدون تفكير رد (لمض افندى ) .

- ترعة .

كل ده و( شقيان ) واقف متابع الموقف ده وسمع كلمة ترعة دى ضحك وقاله .

-لاء بحر او نيل يا استاذ .

وراح (شقيان ) للاستاذ (لمض افندى ).... وهو متحمس .

- لو سمحت انا كنت عايز اسأل عن التعينات الجديدة للمعيدين .

- احنا بعتنالهم ياسيدى .

- بس انا مافيش حاجة جاتلى .

-خلاص .... يبقى ماتعينتش .

- ازاى يعنى دا انا الاول على الدفعة كلها .

- يبقى حاجة من الاتنين يا الشروط ماتنطبقش عليك ..... يا الجواب ضاع فى البُسطة .

- ضاع .... ازاى ..... طب مش المفروض عندكم اسماء المعينين .

- اكيد موجودة .

- طب شوف اسمى .

- لاء حضرتك تروح لمدام ( عُقد هانم ) بضم العين ( احنا اتفقنا مانضحكش) ... هتلاقى الاسماء عندها .

- ودى فين الاستاذه ( عُقد ) .

- الاوضة اللى بعدى على طول .

( شقيان ) جرى على الاوضة و دخل ..... لاقى مجموعة من الموظفات.... وهكرر تانى .... موظفات .... مافيش فيهم راجل واحد .... معرفش ليه الواحد مايدخلش اى مصلحة حكومية غير لما يلاقى فيها 90% ستات والباقى رجالة .... ده لو لقيت راجل اصلا .... تقريبا الوظايف فى الحكومة نازلة لستات بس ..... وقال ايه عايزين يتجوزوا ...... طب ازاى وهما واخدين مكان الرجالة فى الشغل .... والرجالة قاعدة على القهوة ..... طب يتجوزوهم ازاى وهما مش لاقين ياكلوا .... ياريت الستات ما تزعلش منى .... بس سيبوا كام وظيفة كدا لكام راجل عشان يعرف يفتح بيت ... ونحل شويا من البطالة والعنوسة .... نرجع لـــ (شقيان ) تانى ... بعد ما دخل الاوضة ..... ببرءة سأل فين مدام (عُقد ) ..... لاقى صوت بيرد عليه ولا اكن راجل هو اللى بيتكلم بيقول .

- خير ..... انا ( عُقد ) ...... قال يعنى فرحانة باسمها اوى .

اتجه ( شقيان ) نحيت الصوت .... لاقى كائن حى كدا زى الدرفة قصاده .... وحاطة كل الميك اب اللى فى البلد تقريبا ( مش بقولكم عنوسة...ليها حق تبقى عُقد ) .... مسك نفسه وراح ناحيتها .

- صباح الخير يا استاذة .

- اهلا .... اؤمر .

- عايز اعرف جواب التعين ماجاش لحد دلوقتى ليه .

- يمكن يكون اتأخر فى البُسطة .

- طب ممكن تشوفيلى اسمى فى التعينات الجديدة .

- ما بناخدش من التعينات غير وجع القلب .... قول .... اسمك ايه ؟ .

- شقيان صابر شقيان .

فتحت دوسيه كدا كان قدمها .... وقعدت تشوف فيه وقالت .

- لاء اسمك مش هنا .... مش من المعينين .

هو سمع الكلمة دى ... وكأن نزل عليه جبل ميه ساقعة ... مع كام شومة فوق دماغه ... وحاول يمسك نفسه وسألها .

- طب ازاى ..... دا انا الاول على الدفعة .

- ممكن الشروط ماتنطبقش عليك ..... وخصوصا انهم نزلوا شروط جديدة السنة دى .

- شروط جديدة .... زى ايه ؟ .

- انا مش عارفة ... هو انت ابن دكتور ؟ ... ليك حد قريبك ماسك منصب فى البلد ؟... من الاخر ليك حد يوصى عليك ؟.

- لاء ..... بس انا الاول .

- اول ايه .... هى مش بالاول والاخير ....هى ماشية انت ابن مين .... تعرف مين .... كدا ... انت كنت قسم ايه ؟.

- محاسبة ؟ .

- اللى اتعين فى القسم ده ..... زميل ليك اسمه ( مسنود ابو المصالح ) .

- ( مسنود ) ؟؟؟؟؟؟!!!!! ..... ازاااااااااى ...... ده جايب جيد ..... ولا عشان هو ابن الدكتور ابــــــــ .

وقاطعته ( عُقد ) وهى بتقوله .

- بالظاااااااابط .... عشان ابن الدكتور ( ابو المصالح شايف حاله ) .... وعشان الشروط الجديدة تنطبق عليه بالحرف ..... الحدق يفهم بقى .

( شقيان ) مبأش عارف يعمل ايه ..... بيشوف مستقبله بيضيع قدامه او ضائع فعلا ومش عارف يتصرف .... دموعه عايزة تنزل ومابتنزلش .... نفسه يصرخ ويكسر الدنيا .... ومع ذلك واقع الصدمه عليه ..... خلاه ساكت خالص ... واول ما نطق قال .

- حسبى الله ونعمة الوكيل .

ياترى ايه اللى مستنى (شقيان) تانى ..... استنوا (شقيان) فى الحلقة اللى جيا

اقرء المزيد

احلام اليقظة

بعد ماعرف ( شقيان ) النتيجة وانه الاول على الدفعة ...... وحس انه بدأ اول خطوة فى طريق احلامه اللى حلمها كلها ..... اول حاجة عملها بعد كدا ..... اتصل بحبيبته ( نور) ..... مسك التليفون وبكل لهفة

- الو .... ( نور ) ... انا نجحت ..... والاول على الدفعة يا حبيبتى .
- مبروك ياحبيبى .... مبرووووووووووووووك ..... انا فرحانة اوى

( نور ) دى بقى حبه الاول والاخير ...... هى الحاجة الجميلة فى حياة ( شقيان ) . واقفة جنبه ومهونة عليه مرار لدنيا ... من الاخر هى نور حياته ...... المهم نرجع للمكالمة العاطفية دى ..... معلش اصلى بموت فى الرومانسية .

وبمنتهى الحب والرومانسية . وبصوت حنين قالها ( شقيان )
- نجاحى ده نتيجة دعواتك ووقوفك جنبى ياقلبى ..... جامد الواد ( شقيان ) ده عنده احساس .
وهى بكل احساس
- انا حسا ان انا اللى نجحت ياحبيبى وطايرة من الفرحة .
- انا كدا مش هستنى لا قوة عاملة ولا هقف فى طابور البطالة عشان استنى وظيفة ( قالها وهو كله امل ويقين ... معلش حماس الشباب )
ان شاء الله هتعين معيد ونبداء حياتنا سوى ...... واول ما استلم جواب التعين ..... هكون عندكم فى البيت .
هى عملت نفسها مش فاهمة حاجة ..... ولا فاهمة قصده ايه من هكون عندكم فى البيت قال يعنى خلاص وردت
- هتيجى تعمل ايه ؟؟ .
- هاجى اطبخلكم .... ( قالها بضحكة جميلة ) ... يعنى هاجى اعمل ايه ... هاجى اقابل عمى واطلب ايدك منه عشان تبقى معايا على طول .
- وانا اعمل نفسى مكسوفة ..... ولما بابا يجى ياخد رائى ....ابص فى الارض واسكت
- ههههههههه ..... وساعتها يقولوا السكوت علامة الرضا ....... انا هسيبك دلوقت عشان اشوف مظلوم فين واروح البيت افرحهم
- ماشى ياحبيبى .... خد بالك من نفسك

قفل ( شقيان ) الموبايل وراح يدور على ( مظلوم ) ...... وهو ماشى سمع صوت ضحكة عالية من اخر الدنيا ..... راح عليها ...... اصلها دى ضحكة ( مظلوم ) ضحكة مميزة اقوى .... وجه من وراه وقاله .
- مش هتبطل الضحكة دى .
- اهلاااااااااااااااااااااا يابنى .... لو بطلتها شخصيتى تتمحى ..... عملت ايه فى النتيجة ؟ .
- نجحت .... والاول على الدفعة .
- ياجااااااااااااااااااااااااامد ...... تصدق لو مكنتش انت عملتها كنت انا هعملها ...... بس انا قولت اسيبهالك انت اولى ..... وطبقا لمقوله حب لأخيك ما تحب لنفسك .
- طب يا لمض ..... انت عملت ايه ؟؟؟؟ .
- العادى بتاعى ..... الاول عليك ..... ههههههههه ...... قالها وضحك ضحكة عاليا .... كان ( شقيان ) هيضربوا ..... خلاص خلاص .... مقبول زى كل سنة .... هو الواحد مايعرفش يهرج معاك .
- طب يلا عشان نروح ... عايز افرحهم ف البيت .

وخدو بعضهم ومشيوا ... وهما فى طريقهم للبيت ..... قعد ( شقيان ) يحلم ويحكى ( لمظلوم ) احلامه وقد ايه تعب عشان ينجح ويطلع الاول ..... وانه فرحان اوى انه هيتعين فى الجامعة على طول معيد ...... لان ده كان حلم حياته ..... ومش هيتمرمط عشان يشتغل ..... وناس تبيع وتشترى فيه .... واكتر حاجة كانت مفرحا ( شقيان ) انه هيعوض تعب و صبر ابوه عم ( صابر ) طول السنين اللى فاتت . وهيكون فى وظيفة محترمة بجهده وتعبه .... طول عمره بيحلم بيها .

ياترى حلم ( شقيان ) ده هيتحقق ؟؟؟؟ ده فى اللى جى استنونى

اقرء المزيد

الناجح يرفع ايده

الناجح يرفع ايده ،،،،، طبعا كلنا فاكرين الاغنية دى واكيد بتفكرنا بذكريات حلوة ، وفى منا اللى لسا بيدرس وان شاء الله ينجح ويسمعها قريب وكلنا نباركله ،،

المهم ،،،،

دى كانت رنة موبايل ( شقيان ) صحى من النوم على صوت عبد الحليم وهو بيقول ،،،،،، الناجح يرفع ايده ،،، هيه ( والله فال حلو ) اخد الموبايل ورد عليه لقى ( مظلوم ) هو اللى بيكلمه

- انت لسا نايم ،،،،، النتيجة ظهرت

وراح قافل السكة على طول ،، ملحقش ( شقيان ) حتى يرد ،

* *( مظلوم ) ده بقى لوحده حكاية ،،،،، حاجة كدا زى العسل ،، على اد الظلم اللى شافه وبيشوفه فى حياته على اد ما هو واخد كل حاجة ببساطة و بأبتسامة وسخرية

قام ( شقيان ) من على السرير منطور ومفزوع وهو عمال يتخبط فى الاوضة بتاعته عشان يلبس وينزل جرى على الكلية

عارفين انتم الاحساس ده طبعا ،،

وطول السكة عمال يكلم نفسه ،

- ياترى عملت ايه ، نجحت ولا ايه ، ان شاء الله ناجح ، طب لو نجحت هجيب تقدير ولا ايه ،،

يعنى حلمى هيتحقق وابقى معيد فى الجامعة لحد ما اكون دكتور فيها ،، يااااااااارب ،،، وفضل على كدا طول السكة

وكل شويا يقول للسواق ،،،،،

- شد حيلك يااسطى ،،، ونفسه يقوم يقعد مكانه ويسوق هو ،،،،، معزور والله انا حاسس بيه ،،،،،

وصل لحد الجامعة ونزل من الميكروباص ،،، وصاااااااااااااروخ ،،،، خدها جرى من الباب الرئيسى للجامعة لحد كليته

تشوفوه وهو بيجرى ساعتها تقولوا لو كان دخل بطولة العالم فى الجرى السريع كان هياخد مركز اول عن جدارة واستحقاق

* * ااااه صحيح ،،،،،، نسيت اقولكم انه بيدرس فى كلية تجارة ،،،،، كلية الشعب ،،،،،، عنصرية بقى ما انا تجارة زيه

بقى فى ثوانى فى كليته وتشوف المنظر على لوحات النتيجة المتعلقة ، عبارة عن ساحة قتال ،،،، هههههههه

زى لعبة حرب الشوارع اللى كلنا بنلعبها ،،،،،

بس مين ده ، ولا هزت فيه شعراية ،،،، وبكل استبسال وحب فى التضحية بالنفس ، دخل يجيب النتيجة بتاعته

خدلو كدا بتاع بوكسين ،،،،،،، على شلوتين ،،،،،، على .......... ولا بلاش عيب مش هنفضح الراجل ،

وخرج وهو فى منتهى السعادة وبعلو صوته ،،،،،،،

- نجحت ،،،،، نجحت ،،،،، نجحت وهبقى معيد ،،،،، يافرحتك بابنك ياعم ( صابر ) ،،،، صبرت يا أبا ونولت

استنوا اللى جى هتبقى اول مشكلة بتقابل ( شقيان )

اقرء المزيد

يلا نقول بسم الله

بسم الله

بصوا يا جماعة ،،،،،،،،

بصيتوا ،،،،، طب بصووووا تانى ،،،،،، ههههههه ،،،،، خلاص بهرج ما تزقوش ،،،،

انا عملت المدونة دى عشان كل واحد فينا بعد مابيتخرج من كليته بيبقى جواه احلام كتير وعلى اد الاحلام دى كلها على اد ما بيبقى شايل حمل كبير

وبتقابله مشاكل كتير فعايز افضفض معاكوا فى المشاكل دى ونقولها وبصراحة من خلال قصة شاب

اسمه ( شقيان صابر شقيان ) من اول ما بيتخرج لحد ما نشوف هيوصل لايه ،،

وعايز ارائكم معايا فى كل مشكلة بتقابله ونحاول نحط ليها حلول لان مشاكله كتير وهو مالوش ذنب فيها وكتير والله بيصعب عليا

حكايته فيها اسقاطات كتير اوى ،،،، حلوة اوى كلمة اسقاطات دى ،،،،، شكلى كدا هتفلسف ،،،، نقولها بالبلدى كدا فى وجع قلب كتير

مع الحكومة والسياسة ،،،،، بس من غير ما نزعل حد منهم ،،،،،، الناس دى حبايبنا ،،،،، انا من البدايه بقول هفضفض ،،،،،،،،

مش فى نيتى اى حاجة تانى والله ،،،، ههههههههه ،،،،،،، بس صعبان عاليا حال كل الشباب اللى زيى ،،،،، ماهم اخواتى بردو

واكيد انا مريت بحاجات كتير منها ولسا بمر ،،،،، وادينا بنفضفض

اقرء المزيد